ఉసిరి వల్ల ప్రయోజనాలు, ఉసిరి వాడకాలు, ఉసిరి రసం, దుష్ప్రభావాలు మరియు మోతాదు - Amla Benefits, Uses, Juice, Side Effects and Dosage in Telugu

ఉసిరిలోని పీచు పదార్థం తిన్న ఆహారానికి స్థూలత్వాన్ని చేకూరుస్తుంది. ఉసిరి సేవనంతోపాటు తగినంతగా నీటిని తీసుకున్నప్పుడు అది పొట్టలోని మలాన్ని మృదువుగా చేస్తుంది, తద్వారా మలవిసర్జనను (bowl movement) సక్రమంగా నియంత్రిస్తుంది. అంతేకాక, ఉసిరి స్వాభావికమైన శీతలీకరణ గుణాన్ని కలిగి ఉంటుంది, కాబట్టి ఇది కడుపులో అప్పుడప్పుడు కలిగే మంటను తగ్గించి  ఉపశమనాన్నిస్తుంది. అందుకే వేడితత్వం కల్గినశరీరం గలవారికి ఉసిరిసేవనం చాలా మంచిది.

ఉసిరి నొప్పిని నయం చేసే గుణం గల్గిన మూలిక. కానీ అద్భుతంగా చెప్పదగిన విషయమేంటంటే ఆయుర్వేద వైద్యులు గొంతు నొప్పి చికిత్స కోసం అల్లంతో కలిపిన ఉసిరి రసాన్ని సిఫారస్ చేయడం. ఉసిరిలో ఉన్న విటమిన్ ‘సి’ చాలా మంచి అనామ్లజని (antioxidant). గొంతునొప్పికి కారణమయ్యే క్రిములను చంపడానికి అవసరమయ్యే శరీర సామర్థ్యాన్ని ఉసిరిసేవనం మెరుగుపరుస్తుంది. ఉసిరిలోని పోషక లక్షణాలు గొంతు యొక్క కండరాలను బలపరుస్తాయి.

ఎముకల నష్టానికి కారణమయ్యే “ఆస్టియోక్లాస్ట్లు”  అనే కణాలను ఉసిరి నిరోధించి బోలు ఎముకల వ్యాధిని అదుపు చేస్తుంది. ఉసిరి రసం లేదా ఉసిరి పొడిని సేవించడం వల్ల ఆస్టియోక్లాస్ట్లు పెరగకుండా నిరోధింపబడి ఎముకలు పెళుసుబారడం తగ్గుతుంది. ఈ విధంగా, ఉసిరి వినియోగం వల్ల ఎముకలు సుదీర్ఘ కాలంవరకూ బలంగా ఉంటాయి. ఇంకా, మన శరీరంలో ఎముకలు మరియు దంతాలు-రెండింటి ఆరోగ్యానికి కాల్షియమ్ చాలా అవసరం. అలాంటి కాల్షియంను కల్గిన ఉసిరి సేవనం కారణంగా శరీరంలో కాల్షియం శోషణ పెరుగుతుంది. కాబట్టి, మీ ఆహారంలో ఉసిరిని ఓ భాగం చేసుకుంటే వయస్సుకు సంబంధించి దాపురించే ఎముకవిరగడమనే వ్యాధిని నివారించడమే కాక, ఎముకల్ని, దంతాల్ని మరింత పటిష్ఠపరుస్తుంది.  

భారత ప్రజలు ఉసిరిని మానవుడు గుర్తు పెట్టుకోలేనంత పురాతనకాలం నుండి వినియోగిస్తున్నారు. ఉసిరి వాడకం వల్ల వర్ణమయమైన మరియు మెరిసే జుట్టును పొందవచ్చానే విషయం భారతదేశంలో సామాన్య ప్రజలు చాలామందికే బాగా తెలుసు. జుట్టు రాలడాన్ని నివారించేందుకు కొబ్బరి నూనె-ఉసిరి మిశ్రమం బాగా పనిచేస్తుందని ఆయుర్వేద వైద్యులు సూచిస్తున్నారు. ఉసిరిసేవనం, ఉసిరి నూనెను నిత్యం జుట్టుకు పట్టించడం వల్ల వెంట్రుకల కుదుళ్లకు మంచి పోషణ నిచ్చి జుట్టురాలడాన్ని తగ్గిస్తుంది, వెంట్రుకలు పెరగడానికి దోహదపడుతుంది. ఉసిరిసేవనం వల్ల  ఆరోగ్యవంతమైన మరియు మెరిసే జుట్టు మీ స్వంతమవుతుంది. ఉసిరిలోని యాంటీఆక్సిడెంట్ లక్షణాలు జుట్టుకు కలిగే నష్టాన్ని నివారించి జుట్టు రాలడాన్ని నివారిస్తుంది. ఉసిరి నూనె వాడకం పురుషుల్లో వచ్చే బట్టతల నివారణకు పనిచేస్తుందని, ఇది నిరూపితమైన పరిష్కారం అని నిపుణులు చెప్తున్నారు. ఇటీవలి ఓ అధ్యయనం ప్రకారం, జుట్టు రాలడానికి కారణమయ్యే “5 ఆల్ఫా రిడక్టేజ్” ను ఉసిరి నూనె శక్తివంతంగా నివారించి జుట్టు పెరుగుదలకు దోహదం చేస్తుంది.

ఈ ప్రపంచంలో వృద్ధాప్యం పట్ల ప్రతి ఒక్కరికీ ఒకింత ఏహ్యభావం ఉంటుందనే చెప్పవచ్చు. చిరుప్రాయంలోనే వచ్చే ముసలితనాన్ని ఎవరూ ఇష్టపడరు. ప్రతి ఒక్కరూ తాము ఎప్పటికీ యువకుడిగానే ఉండాలని కోరుకుంటారు. యవ్వనవంతమైన చర్మం కావాలని కలలు గని, దాన్ని వెంటనే నిజజీవితంలో సాధించడం కూడా జరిగింది అంటే అది ఎంతో అనుకూలమైన విషయం కాదా?  మన శరీరంలో సాధారణంగా జరిగే జీవక్రియ చర్యల ఫలితంగానే వయసు పెరగడం, ముసలితనం దాపురించడం జరుగుతుంది. స్వేచ్ఛా రాశులకు (free radical) కలిగే హానిని మన శరీరంలో ఏర్పడే వయసు పెరిగిపోయే క్రమానికి ఓ పెద్ద కారణంగా పేర్కొంటున్నారు. దురదృష్టవశాత్తు వయసు ముదరడమనే దాన్ని ఆపలేం, ఎందుకంటే మన శరీరంలో జరిగే జీవక్రియల కారణంగానే ఇది (వయసు పెరగడం) జరుగుతుంది. వయసు పెరగడమనేది నిలిపివేయబడదు. రోజువారీ జీవితంలో ఎదుర్కొనే ఒత్తిడి మరియు ఆధునిక జీవనశైలి వయసుమీరడమనే ఈ సమస్యను, అగ్నికి ఆజ్యం తోడైనట్లు, మరింత తీవ్రతరం చేస్తాయి. వీటిని ఎదుర్కోవటం దాదాపు అసాధ్యం. ఈ స్వేచ్ఛా రాశులతో   పోరాడే ఏకైక మార్గం ఏదంటే అనామ్లజనకాల యొక్క మోతాదును పుచ్చుకోవడమే. మరి అలాంటి అనామ్లజనకాల్ని పుష్కలంగా కల్గిన ఉసిరి మీకు అందుబాటులోనే ఉంది. ఇది శుభవార్తే గదా మరి. పోషకాహారాలు మరియు అనామ్లజనకాల (యాంటీఆక్సిడెంట్ లు)కు నిలయమైన ఉసిరిసేవనం అనామ్లజని నష్టాన్ని తగ్గించడమే గాక చర్మానికి పునర్జీవాన్ని ప్రసాదించి విటమిన్లు మరియు పోషక పదార్ధాలతో పుష్టీకరిస్తుంది. ఉసిరిసేవనం వల్ల చర్మం ఆరోగ్యదాయకంగా మరియు యౌవనదాయకంగా  కనిపించేలా చేస్తుంది.

ఉసిరి రసాన్ని రోజూ సేవిస్తే శరీరంలో ఇన్సులిన్ ను ఉత్పత్తి చేసే కణాలు ఉత్తేజితమై మరింత ఇన్సులిన్ ఉత్పత్తి కావడం జరుగుతుంది. ఇలా ఉత్పత్తి అయిన ఇన్సులిన్ హార్మోను రక్తం నుండి గ్లూకోజ్ను తీసుకుని కాలేయంలో నిల్వ చేస్తుంది, తద్వారా, రక్తంలో చక్కెర స్థాయిల్లో తగ్గుదలకు దారితీస్తుంది. చక్కెరవ్యాధి రోగుల  రక్తంలో చక్కెర స్థాయిలను తగ్గించడంలో ఉసిరి గుణకారిగా పనిచేస్తుందని మరియు ఉసిరి అత్యంత సాధారణమైన డయాబెటిక్ ఔషధాల్లో (anti-diabetic medicine) ఒకటి అని ఇటీవలి అధ్యయనం పేర్కొంది.

పచ్చి ఉసిరికాయ కానీ లేదా ఉసిరి చూర్ణాన్ని గాని రోజువారీగా తీసుకుంటే శరీరంలోని కొలెస్ట్రాల్ (కొవ్వు) స్థాయిలలో గణనీయమైన తగ్గుదలను గమనించొచ్చు. కొవ్వును నిరోధించే ఏజంటుగా ఉసిరి పనిచేస్తుంది. మరో అధ్యయనం ప్రకారం, శరీరంలోని కొలెస్టరాల్ స్థాయి తగ్గిపోవడం వల్ల కాలేయంపై ఒత్తిడి తగ్గుతుందని, తద్వారా, కాలేయ వాపు  వ్యాధి వచ్చే అవకాశాలు తగ్గుతాయి. ఉసిరిలోని “క్రోమియం” అనే పదార్ధం కారణంగా ధమనులలో ఫలకాన్ని (కొవ్వు నిక్షేపాలు) తొలగించడంలో సహాయపడుతుంది, తద్వారా ధమనుల్లో రక్తం గడ్డ కట్టడమనేది నివారింపబడి గుండెపోటు ప్రమాదం తప్పుతుంది.

(మరింత సమాచారం: అధిక కొలెస్ట్రాల్ చికిత్స)

రక్తం మన శరీరంలో దేన్నైనా ప్రసారం చేసే (లేదా బదిలీ) ఓ  ప్రాథమిక మాధ్యమం. శరీర అవయవాలకు అవసరమైన ప్రాణవాయువును మరియు పోషక అంశాలను అందించడం  మరియు శరీరం నుండి విషతుల్య పదార్థాలను తొలగించడం రక్తం చేసే ముఖ్య విధులు. మన శరీరంలోని రక్తం యొక్క స్వచ్ఛతకు మన జీవనశైలి, తీసుకునే మందులు మరియు ఆహారపు అలవాట్లు వంటి అంశాలు, జంక్ ఫుడ్ తినడం, ఒత్తిడికి లోనవడం, లేదా మధుమేహం (చక్కెరవ్యాధి) వంటి వ్యాధులకు గురవడం వంటివి  బలమైన ప్రభావాన్ని చూపుతాయి. ఈ అంశాలు రక్తం స్వచ్ఛతకు హానిని కూడా కలిగించొచ్చు. ఇది రక్తం స్వచ్ఛత యొక్క హానికరమైన ప్రభావాన్ని కలిగి ఉంటుంది. పేర్కొన్న ఈ సమస్యలు రక్తం యొక్క శుభ్రపరిచే ప్రక్రియను తగ్గిస్తాయి. పైగా రక్తం నిండా విషతుల్య పదార్థాలను నింపవచ్చు. తద్వారా, మోటిమలు, చర్మం గాయాలు లేదా అకాల వృద్ధాప్యం వంటి పరిస్థితులను దాపురిస్తాయి. రక్తంలో ఇలా విషపదార్థాలు చోటు చేసుకోవడం వల్ల దాని ప్రభావం శరీరం యొక్క అన్ని అవయవాల సాధారణ విధులకు అడ్డంకుల్ని ఏర్పరచవచ్చు. తద్వారా ఇతర అంటువ్యాధులు, తదితర జబ్బులు వచ్చే అవకాశం ఎక్కువవుతుంది. ఉసిరి ఓ అద్భుతమైన నిర్విషీకరణ (డిటాక్సిఫైయర్) పదార్ధం, ఇది రక్తంలో ఉన్న మలినాలను తొలగించడానికి ఓ మంచి ఏజెంట్ గా పనిచేస్తుంది. మూత్రప్రేరేపణకారి (diuretic) అయిన ఉసిరి శరీరం నుండి అన్ని అదనపు లవణాలను తొలగించి, రక్తంలోని అశుద్ద పదార్థాలను బహిష్కరించి రక్తాన్ని శుభ్రంగా ఉంచడానికి సహాయపడుతుంది. అదనంగా, ఉసిరి తనకున్న పోషక ప్రభావాల కారణంగా ఆక్సిజన్-వాహక ఎర్ర రక్త కణాలు మరియు హేమోగ్లోబిన్ స్థాయిల్ని పెంచుతుంది. ఇలా జరగడం మూలంగా శరీరం అంతటా ఆక్సిజన్ యొక్క ఉత్తమ ప్రసరణకు దారి తీస్తుంది. మీకిప్పటికే  తెలిసినట్లుగా, రక్తంలో ఆక్సిజన్ స్థాయిలెక్కువగా ఉంటే మొత్తం శరీరంలోని మలినాలు కూడా తక్కువైపోతాయి.

ఉసిరిలో ఉండే అనామ్లీకరణ (యాంటీఆక్సిడెంట్) లక్షణాలు మన శరీరంలో రోగనిరోధకశక్తిని పెంచే మందు (ఇమ్మ్నోమోడాలేటర్)గా పని చేస్తుంది. రోజువారీ ఆహారంలో ఉసిరిని కూడా తీసుకుంటే శరీరంలోని తెల్ల రక్త కణాల సంఖ్యను పెంచుతుంది. (తెల్లరక్తకణాలు శరీరంలో ప్రవేశించే బ్యాక్టీరియాను చంపుతాయి) తద్వారా, వేగవంతమైన మరియు మరింత ప్రభావవంతమైన రోగనిరోధక శక్తిని ఉసిరి మనకందిస్తుంది.  

(మరింత సమాచారం: రోగ నిరోధక శక్తిని పెంచుకోవడం ఎలా)

బరువు పెరగడానికి దారితీసే అతి సాధారణ కారణాలలో జీర్ణ వ్యవస్థ లోపాలు ఒకటి. తిన్న ఆహారమంతా జీర్ణం కాకుండా పొట్టలో నిల్వ అవడం, దాన్ని శరీరం బహిష్కరించలేక పోవడం, శరీరం ఆహారంలోంచి తగినంతగా పోషకాలను గ్రహించలేక పోవడం జరిగినట్లయితే, శరీరంలో అనవసరమైన బరువు చేరడం మొదలవుతుంది. ఈ అదనపు బరువును కోల్పోయి తిరిగి ఎలాంటి బాదరబందీ లేని తేలికైన శరీరాన్ని పొందడానికి ఉసిరితో కూడిన అనేక మార్గాలు ఉన్నాయి. అందులో మొదటిది, మూత్రవిసర్జనకు దోహదం చేసే ఉసిరిసేవనం. ఉసిరి మూత్రవర్ధకం. అధిక బరువున్నవారి శరీరంలో అవసరానికి మించిన నీరు, లవణాలు ఉండి అదనపు బరువులో ఇవేపెద్ద భాగాన్ని కలిగి ఉంటాయి. ఉసిరిసేవనం శరీరం నుండి ఈ అదనపు నీరు మరియు లవణాలను తొలగించడానికి సహాయపడుతుంది. ఇంకా, ఉసిరి పీచుపదార్థాన్ని ఎక్కువగా కల్గి ఉంటుంది గనుక ఆకలిని తగ్గించి మీరు తక్కువ తినడానికి దోహదం చేస్తుంది. తద్వారా, అధికంగా ఆహారాన్ని తీసుకోవడం, ఎక్కువ సార్లు భోంచేయడం వంటి చర్యల్ని ఉసిరిసేవనం గణనీయంగా తగ్గిస్తుంది. ఆకలిని తట్టుకునే శక్తిని పెంచి, భోజనానీకీ -భోజనానికీ మధ్య ఉండే సమయాన్ని  పెంచుతుంది ఉసిరి. చివరగా, ఆహారాన్ని సులభంగా జీర్ణం చేసుకునేటందుకు మరియు ఆహారంలోంచి పోషకాలను రక్తంలోకి బదిలీ చేయడానికి ఉసిరి సేవనం మీకు సహాయపడుతుంది. రోజువారీగా శరీరంలో అధిక పోషకాల్ని శరీరానికి అందించి మిమ్మల్ని చురుకైనవారిగా మారుస్తుంది ఉసిరి. కాబట్టి, మీరు ఇంకా దేనికి వేచి చూస్తున్నారు? అద్భుతమైన ఈ ఉసిరిపండును మీ ఆహారంలో రోజూ తీసుకోండి, అధిక బరువును సులభంగా వదిలించుకోండి.

(మరింత సమాచారం: బరువు తగ్గుదలకు ఆహార విధాన పట్టిక)

దృష్టి-సంబంధ, కంటి దోషాలకు కూడా ఉసిరి మేలు చేస్తుంది. మీ అస్పష్టమైన చూపు కారణంగా మీరు ఉపయోగిస్తున్న చదివే అద్దాలు (reading glaases) కంటికి బరువై అలసిపోతున్నారా? మీ పరిస్థితిని గమనించి మీ స్నేహితులు మీకు కాంటాక్ట్ లెన్సులు, లేజర్స్ సిఫార్సు చేస్తున్నారా? ఇదంతా మిమ్మల్ని కలవరపెడుతోందా? కంటి చూపును మెరుగుపరిచేందుకు తోడ్పడే చాలా ముఖ్యమైన కరోటెనోయిడ్లు మరియు విటమిన్ ‘ఎ’ లను ఉసిరి దండిగా కల్గి ఉంది. అదనంగా, ఉసిరిలో ఉన్న విటమిన్ సి మన కంటిలో ఉన్న రెటీనా కణాలపై ఉద్దీపనా ప్రభావాన్ని కలిగి ఉంటుంది. అందువల్ల, కంటి-సంబంధ సమస్యలకు మరియు దృష్టి-దోష నివారణకు ఆయుర్వేద వైద్యులు ఉసిరిని అత్యుత్తమ ముందుగా సిఫారస్ చేయడంలో ఆశ్చర్యం కల్గించదు. రోజుకు రెండుసార్లు ఉసిరి రసాన్ని సేవిస్తే కంటి చూపును మెరుగుపరుచుకోవడంలోగుణాత్మక మార్పుల్ని గమనించవచ్చు.

ఉసిరి విటమిన్ ‘సి’ ని కల్గి ఉండే ఉత్తమ సహజ వనరులలో ఒకటి. వాస్తవానికి ఇది నారింజ కన్నా 20-30 రెట్లు ఎక్కువ విటమిన్-సి ని కలిగి ఉంటుందని చెప్పబడింది. మానవ శరీరం సొంతంగా విటమిన్ ‘సి’ ని ఉత్పత్తి చేసుకోలేదు కనుక, ఈ విటమిన్ ను శరీరానికి భర్తీ చేయడానికి ఉసిరి లాంటి ప్రత్యేక ఆహార పదార్ధం చాలా అవసరం. శరీరంలో విటమిన్ సి లోపం ఏర్పడి దాపురించే వ్యాధి “స్కర్వీ.” దంత-చిగుళ్లలో రక్తస్రావం, చిగుళ్లు నల్లబడడం వంటి  లక్షణాలను స్కర్వీ కలిగి ఉంటుంది. ఉసిరి పండును రోజూ సేవించడం ద్వారా ఈ స్కర్వీ వ్యాధి నుండి బయటపడొచ్చు.