ద్రాక్షపళ్ళ ప్రయోజనాలు మరియు దుష్ప్రభావాలు - Benefits and Side Effects of Grapes in Telugu

శరీరంలో అధిక ఆక్సీకరణ ఒత్తిడి కారణంగా కణాలకు ఏర్పడిన ఫ్రీ రాడికల్ నష్టాన్ని సరి చెయ్యడంలో యాంటీఆక్సిడెంట్లు సహాయపడతాయి. కొన్నిసార్లు ఆక్సీకరణ ఒత్తిడి గుండె జబ్బులు, మధుమేహం మరియు క్యాన్సర్ వంటి దీర్ఘకాలిక వ్యాధులకు కారణమవుతుంది. ద్రాక్షలో విటమిన్ సి, బీటా-కెరోటిన్, ల్యూటిన్ (lutein), క్వెర్సెటిన్ (quercetin), ఎల్లాజిక్ ఆమ్లం (ellagic acid) మరియు లైకోపీన్ వంటి అనేక శక్తివంతమైన యాంటీఆక్సిడెంట్లు ఉంటాయి. ఆశ్చర్యకరంగా, ఆరోగ్యానికి ప్రయోజనకరమైన 1600 మొక్కల సమ్మేళనాలు ఈ పండులో ఉన్నట్లు కనుగొన్నారు.

ద్రాక్షపై జరిపే చాలా పరిశోధనలు దాని విత్తనం లేదా పైతోలు యొక్క సారాలను ఉపయోగించి చేయబడుతాయి. ఎర్ర ద్రాక్షకి దాని రంగు ఏర్పడడానికి బాధ్యత వహించే అంథోసియానిన్లు కూడా అద్భుతమైన యాంటీఆక్సిడెంట్ లక్షణాలను కలిగివుంటాయి. కిణ్వప్రక్రియ (ఫెర్మెంటేషన్) తర్వాత కూడా, ఈ యాంటీఆక్సిడెంట్లు ద్రాక్షలోనే ఉంటాయి, అందువల్లనే అటువంటి సమ్మేళనాలు రెడ్ వైన్ లో ఎక్కువగా ఉంటాయి.

(మరింత సమాచారం: యాంటీఆక్సిడెంట్ ఆహార వనరులు)

రక్త పోటు స్థాయిలలో హెచ్చుతగ్గులు ప్రతి వయస్సు వారిలో కనిపించే ఒక సాధారణ ప్రక్రియగా మారిపోయింది. యువత కూడా ఈ సమస్య వలన బాధపడుతుంటారు. అటువంటి వ్యాధులలో మందులు తప్పనిసరి అయినప్పటికీ, అటువంటి వ్యాధులను ఎదుర్కొనేందుకు సహాయపడే సాధారణ గృహ నివారణ చిట్కాలను పాటించడం ఎల్లప్పుడూ మంచిది. ద్రాక్షలో అధిక స్థాయిలో ఉండే పొటాషియం, శరీరంలోని రక్తపోటు స్థాయిలను నియంత్రించడానికి ఉపయోగకరంగా ఉంటుంది. శరీరంలో పొటాషియం తక్కువ స్థాయిలో ఉండడం వలన అది అధిక రక్తపోటు, స్ట్రోక్ మరియు గుండె జబ్బుల ప్రమాదాన్ని పెంచుతుంది. పెద్దలలో నిర్వహించిన ఒక అధ్యయనం ప్రకారం, శరీరంలో సోడియం కంటే పొటాషియం స్థాయిలు తక్కువగా ఉన్న వ్యక్తులతో పోల్చితే పోటాషియం స్థాయిలు అధికంగా ఉన్న వ్యక్తులు  హృదయ వ్యాధి కారణంగా చనిపోయే ప్రమాదాన్ని తక్కువగా కలిగి ఉంటారు.

(మరింత సమాచారం: అధిక రక్తపోటు లక్షణాలు)

ద్రాక్షలో శరీరంలోని కొలెస్ట్రాల్ యొక్క శోషణను తగ్గించే కొన్ని రకాల కాంపౌండ్లు ఉంటాయి మరియు అవి అధిక కొలెస్ట్రాల్ స్థాయిల నుండి శరీరాన్ని రక్షించడంలో సహాయపడతాయని నిరూపించబడింది. ఒక అధ్యయనంలో, హైపర్లిపిడెమిక్ (hyperlipidemic) వ్యక్తులకు ఎర్ర ద్రాక్షను 8 వారాల పాటు ఇవ్వడం జరిగింది. నియమిత కాలం తర్వాత, "చెడ్డ" లేదా ఎల్.డి.ఎల్ (LDL) కొలెస్ట్రాల్ స్థాయిలో తగ్గుదల గమనించబడింది. అయితే, ఈ ప్రభావము తెలుపు ద్రాక్ష వినియోగంలో కనుగొనబడలేదు.

ఇటీవల ఒక అధ్యయనం, ద్రాక్షలో ఉన్న రెస్వెట్రాల్ (resveratrol), అనే  రసాయనిక సమ్మేళనం ఎథెరోస్క్లెరోసిస్ ప్రమాదాన్ని తగ్గించడానికి చాలా ఉపయోగకరంగా ఉందని సూచించింది.

(మరింత సమాచారం: అధిక కొలెస్ట్రాల్ చికిత్స)

ద్రాక్షలో చెక్కెర పరిమాణం చాలా తక్కువ మోతాదులో ఉంటుంది అందువల్ల మధుమేహంతో  బాధపడుతున్నవారికి ఇది చక్కని ఎంపిక. దాదాపు 40 మంది పురుషులలో నిర్వహించిన క్లినికల్ అధ్యయనంలో ద్రాక్షలో ఉండే సమ్మేళనాలు (కాంపౌండ్లు ) రక్తంలో చక్కెర స్థాయిలను తగ్గించడంలో ప్రభావవంతంగా ఉన్నాయని తేలింది. ఈ పురుషులలో 16 వారాలపాటు ప్రతిరోజూ ద్రాక్ష తీసుకున్న (తిన్న) తర్వాత రక్త చక్కెర స్థాయిలు తగ్గినట్లు గుర్తించడం జరిగింది.

ద్రాక్షలో ఉండే రెస్వేరట్రాల్ (Resveratrol) శరీరంలో ఇన్సులిన్ యొక్క సున్నితత్వాన్ని పెంచుతుంది, తద్వారా ఇది రక్తంలో చక్కెర స్థాయిలను తగ్గిస్తుంది. అంతేకాక, రెస్వేరట్రాల్ కణాల మీద ఉండే గ్లూకోజ్ గ్రాహకాల (glucose receptors) సంఖ్యను పెంచుతుంది తద్వారా అవి రక్తం నుండి గ్లూకోజ్ను అధికంగా గ్రహించడంతో బాధ్యత వహిస్తుంది.

ద్రాక్ష పళ్ళను క్రమముగా తీసుకోవడం ద్వారా సాధారణ కంటి వ్యాధులను నిరోధించవచ్చు. ఇన్ వివో (జంతు ఆధారిత) అధ్యయనంలో, ద్రాక్ష కలిగిన ఆహార విధానం రెటీనా నష్టం యొక్క సంకేతాలను తగ్గించిందని మరియు కళ్ళు యొక్క పనితీరును మెరుగుపరచిందని తేలింది. ద్రాక్ష యొక్క రెస్వేరట్రాల్ కంటెంట్ వయస్సు సంబంధిత మాక్యులర్ డిజెనరేషన్ (AMD, age-related Macular Degeneration) ప్రమాదాన్ని తగ్గించడానికి చాలా ఉపయోగకరంగా ఉంటుంది. గ్లూకోమా మరియు కంటిశుక్లాలు వంటి వివిధ కంటి వ్యాధులకు వ్యతిరేకంగా కళ్ళను రక్షించడంలో రెస్వేరట్రాల్ యొక్క యాంటీఆక్సిడెంట్ లక్షణాలు ఉపయోగపడతాయని మరొక అధ్యయనం సూచించింది.ద్రాక్షలో ఉండే ల్యూటిన్ (lutein) మరియు జియాజాంతిన్ (zeaxanthin) వంటి యాంటీఆక్సిడెంట్లు నీలం కాంతి (blue light) కలిగించే హానికరమైన ప్రభావాల నుండి కూడా కళ్ళకు రక్షణ కల్పిస్తాయి.

(మరింత సమాచారం: మాక్యులర్ డిజెనరేషన్ కారణాలు)

క్రమంగా ద్రాక్ష తినడం అనేది మెదడుకు ఉపయోగకరంగా ఉంటుంది మరియు జ్ఞాపకశక్తిని కూడా పెంచుతుంది.ఒక  క్లినికల్ అధ్యయనంలో, కొంత మంది ఆరోగ్యకరమైన వ్యక్తులకు 12 వారాలపాటు ప్రతిరోజూ ద్రాక్షను ఇవ్వడం జరిగింది. 12 వారాల తర్వాత వారిలో జ్ఞాపకశక్తి మరియు మేధాశక్తిలో గణనీయమైన అభివృద్ధి గమనించబడింది. యువకులలో జరిపిన మరొక అధ్యయనంలో ద్రాక్ష రసాన్ని రోజు తాగితే 20 నిమిషాల వ్యవధిలోనే వారి మానసిక స్థితి (మూడ్) మెరుగుపడిందని తేలింది. జ్ఞాపకశక్తి సంబంధిత నైపుణ్యాల మెరుగుదల కూడా గుర్తించబడింది. జంతు ఆధారిత అధ్యయనాలు 4 వారాలపాటు క్రమంగా ద్రాక్షను తీసుకోవడం వలన దానిలో ఉండే రెస్వేరట్రాల్ నేర్చుకోవడం, మూడ్ మరియు జ్ఞాపకశక్తిని పెంచవచ్చని పేర్కొన్నాయి. అదనంగా ద్రాక్షను తీసుకోవడం అనేది మెదడుకు రక్త ప్రసరణ యొక్క పెరుగుదలకు సహాయపడుతుంది అది మెదడు పనితీరు మెరుగుపడడానికి కారణమవుతుందని నివేదించబడింది.

(మరింతసమాచారం: చిత్తవైకల్యం కారణాలు)

ద్రాక్షలో యాంటీఆక్సిడెంట్లు మరియు ఇతర సమ్మేళనాలను ఉంటాయి, ఇవి వృద్ధాప్య లక్షణాలను తగ్గిస్తాయి మరియు జీవితకాలాన్ని పెంచుతాయి. యాంటీఆక్సిడెంట్లు శరీరంలో ఉండే ఫ్రీ రాడికల్స్ ను తగ్గిస్తాయి దానివలన మచ్చలు, నల్ల మచ్చలు, వెంట్రుకలు నెరవడం వంటి వృద్ధాప్య లక్షణాలు తగ్గుతాయి. ద్రాక్షలో ఉన్న రెస్వేరట్రాల్ వివిధ జంతు జాతుల యొక్క జీవితకాలాన్ని పొడిగించిందని ఒక అధ్యయనం పేర్కొంది. ఈ సమ్మేళనం (కాంపౌండ్) సిర్ట్యూయిన్స్ (sirtuins) అనే ప్రోటీన్ల కుటుంబాన్ని కలిగి ఉంటుంది అవి దీర్ఘాయిషుతో సంబంధం కలిగి ఉంటాయి.

ద్రాక్షలో ఉండే అనేక బయో ఆక్టివ్ సమ్మేళనాలు యాంటీ బాక్టీరియల్ లక్షణాలను చూపిస్తాయి. ద్రాక్ష పై తోలు నుండి తీసిన సారాలు ఫ్లూ వైరస్కు వ్యతిరేకంగా ఒక రక్షణగా పని చేయవచ్చు అని ఒక అధ్యయనం తెలిపింది. మరొక అధ్యయనంలో, చికెన్ పాక్స్ (అమ్మవారు) మరియు హెర్పిస్ వైరస్ యొక్క పెరుగుదల మరియు వ్యాప్తిని నిరోధించగల సామర్థ్యం ద్రాక్షకు ఉన్నట్లు తేలింది. అంతేకాక, సాధారణ ఈస్ట్ ఇన్ఫెక్షన్లను తగ్గించడంలో కూడా ప్రభావవంతమైనదిగా ఇది గుర్తించబడింది.

ద్రాక్ష విటమిన్ సి యొక్క గొప్ప వనరు కావడంవల్ల, రోగనిరోధక వ్యవస్థను ప్రేరేపించవచ్చు, తద్వారా సాధారణ అంటువ్యాధులకు వ్యతిరేకంగా పోరాడటానికి శరీరానికి సామర్థ్యాన్ని అందిస్తుంది.

(మరింత సమాచారం: రోగనిరోధక శక్తిని పెంచే ఆహారాలు)

ద్రాక్షను తీసుకోవటం గుండెకు మంచిది చెప్పబడింది. కొరోనరీ గుండె వ్యాధి ఉన్న 75 మంది రోగుల బృందంపై నిర్వహించిన క్లినికల్ అధ్యయనంలో రెస్వేరట్రాల్ ఉండే ద్రాక్షను క్రమముగా తీసుకోవడం వలన సానుకూల కార్డియోవాస్కులర్ ప్రయోజనాలను అందించిందని సూచించింది.

అదనంగా, ద్రాక్ష శరీరంలోని కొలెస్ట్రాల్ ను తగ్గిస్తుంది, కొలెస్ట్రాల్ అధిక రక్తపోటు మరియు గుండెపోటుతో పాటుగా గుండె సంబంధిత సమస్యల యొక్క ప్రధాన కారణాల్లో ఒకటి.

(మరింతసమాచారం: గుండె వ్యాధుల కారణాలు)